ՀՀԿ-ի գործադիր մարմնի անդամ Էդուարդ Շարմազանովը հակակոռուպցիոն դատարանի բակում լրագրողների հետ զրույցի ընթացքում անդրադարձել է մի շարք հարցերի՝ սկսած Սերժ Սարգսյանի գործով դատական նիստի ընթացքից մինչև երկրի ներքին քաղաքական իրավիճակը։
Նրա խոսքով՝ Նիկոլ Փաշինյանն ու խաղաղությունն իրար հետ այնքան կապ ունեն, որքան Ադրբեջանի նախագահ Իլհամ Ալիևն ու ժողովրդավարությունը։ Ըստ Շարմազանովի՝ Նիկոլ Փաշինյանը որևէ իրավունք չունի խոսելու խաղաղությունից, քանի որ ունեցել է հնարավորություն կանգնեցնելու պատերազմը, սակայն չի կանգնեցրել։
Գործիչը նշել է, որ 2021 թվականին Փաշինյանը հաջողությամբ մոլորեցրել է ընտրողներին՝ խոսելով «Անջատում հանուն փրկության» սկզբունքի մասին, սակայն հետո ճանաչել է Արցախը Ադրբեջանի մաս։ Շարմազանովը կարծում է, որ իրական խաղաղություն հաստատելու համար անհրաժեշտ է քվեարկել այն ընդդիմադիր ուժերի օգտին, որոնք ունեն խորհրդարան անցնելու իրական շանսեր։ Նա ընդգծել է, որ Երրորդ հանրապետությունն Արցախյան շարժման ուղղակի հետևանքն է, իսկ Անկախության հռչակագիրն իր մեջ ներառում է Արցախի գաղափարը։ Ըստ այդմ՝ պետք է հավատարիմ մնալ Հռչակագրի սկզբունքներին, իսկ ընդդիմությունը պետք է մի կողմ դնի տարաձայնությունները և միավորվի։
Անդրադառնալով Հայոց ցեղասպանության միջազգային ճանաչման օրակարգից հրաժարվելուն՝ Շարմազանովը հիշեցրել է, որ ՀՀԿ-ն և երրորդ նախագահը միշտ կողմ են եղել Թուրքիայի հետ հարաբերությունների կարգավորմանը։ Նրա պնդմամբ՝ Փաշինյանն առաջին ղեկավարն է, որը հարաբերությունները պատկերացնում է Ադրբեջանի և Թուրքիայի պարտադրած պայմաններով, ինչի վառ ապացույցը, ըստ նրա, Էրդողանի գիրքը կրծքին սեղմած Փաշինյանի լուսանկարն է։
Նա նաև նշել է, որ վերջերս ԱԺ նախագահը հայտարարել էր, թե Ադրբեջանը խոչընդոտում է Թուրքիայի հետ հարաբերությունների կարգավորմանը։ Ըստ Շարմազանովի՝ եթե Ադրբեջանի հետ բանակցություններում ամեն ինչ հարթ է, ապա ինչո՞ւ է նա խանգարում Հայաստան-Թուրքիա գործընթացին, հավելելով, որ դա ուղղակի բլեֆ է։
Գործիչը եզրափակել է, որ չպետք է քվեարկել Նիկոլ Փաշինյանի օգտին, որպեսզի երկիրը զերծ մնա թե՛ պատերազմից, թե՛ կապիտուլյացիայից։
